Яндекс Құжаттар сервисін пайдалану шарттары

1. Жалпы ережелер

1.1. Осы құжат (бұдан әрі – «Шарттар») Яндекс Құжаттар (Құжаттар/Сервис) сервисін пайдалану шарттарын белгілейді және https://yandex.ru/legal/360_termsofuse мекенжайы бойынша орналастырылған Яндекс 360 сервистерін пайдаланудың жалпы шарттарының (бұдан әрі – «Жалпы шарттар») ажырамас бөлігі болып табылады.

Яндекс Құжаттар сервисін/оның жекелеген функционалдық мүмкіндіктерін пайдалана бастағанда, Пайдаланушы/Корпоративтік клиент осы Шарттарды және Жалпы шарттарды толық көлемде, ешқандай ескертпелерсіз және ерекшеліктерсіз қабылдаған болып есептеледі.

Шарттардың қолданыстағы редакциясы әрқашан Интернет желісінде мына мекенжай бойынша бетте орналасқан: https://yandex.ru/legal/docs_termsofuse/.

Пайдаланушы/Корпоративтік клиент көрсетілген құжаттардың қандай да бір ережесімен келіспеген жағдайда, Пайдаланушы Яндекс 360 сервистерін пайдалануға құқылы емес.

1.2. Яндекс 360 сервистерін пайдаланудың бірыңғай қағидалары мен қағидаттары, зияткерлік меншік, дербес деректерді өңдеу және жауапкершілік туралы ережелер осы Шарттарда қамтылған ерекшеліктерді ескере отырып, Жалпы шарттармен реттеледі.

2. Яндекс Құжаттар сервисін пайдалану ерекшеліктері

2.1. Сервис Пайдаланушыға Құжаттарды (а) Р7 Офис сервисі (https://r7-office.ru/, «Р7» АҚ, НМТН 1025202837615) https://r7-office.ru/license-agreement/ мекенжайы бойынша орналастырылған шарттарда ұсынатын функционалды қолдана отырып немесе (б) Яндекстің жасанды интеллект элементтері бар меншікті технологияларын (бұдан әрі – «Яндекс технологиясы») қолдана отырып жасау, қарау, өңдеу, құрылғыда сақтау функционалдық мүмкіндігін ұсынады.

2.2. Пайдаланушы жасайтын Құжаттар оның Дискідегі дискілік кеңістігінде сақталады. Яндекс Пайдаланушы жасаған және/немесе қараған / өңдейтін Құжаттардың Дискіде көрсетілетін саны бойынша шектеулер белгілеуге құқылы.

2.3. Сервисті пайдалану Яндекс ID-дегі есептік жазбаны қолдана отырып жүзеге асырылады. Пайдаланушының / Корпоративтік клиент қызметкерінің логині (есептік жазба атауы), сондай-ақ осындай логинді тіркеу (пайдалану) кезінде көрсетілген «Аты», «Тегі», «Жынысы» және «Яндекстегі аты» өрістерінің деректері, сондай-ақ оның профиль бетіндегі кескін (аватар) және электрондық пошта мекенжайы үшінші тұлғаларға көрсетілуі және танысу үшін қолжетімді болуы мүмкін, оның ішінде Пайдаланушы / Корпоративтік клиенттің қызметкері Құжаттардағы файлдарға ортақ қол жеткізу құқықтарын алған кезде және Пайдаланушы / Корпоративтік клиенттің қызметкері ортақ қол жеткізу құқықтары берілген файлдарда түсініктемелер қалдырған кезде.

2.4. Сервис Пайдаланушыға Құжатқа сілтемені көшіру арқылы оған ортақ қол жеткізуді белгілеу мүмкіндігін ұсынады, соның нәтижесінде Құжат бірлесіп өңдеу үшін – бірнеше Пайдаланушының Сервис арқылы бір Құжатты қарауы және оған өзгерістер енгізуі үшін қолжетімді болуы мүмкін. Яндекс бірлесіп өңдеуді жүзеге асыратын Пайдаланушылардың саны бойынша шектеулер белгілеуге құқылы.

2.5. Яндекс технологиясының функционалдық мүмкіндіктері Р7 Офис сервисінің функционалдық мүмкіндіктерінен өзгеше болуы мүмкін. Яндекс технологиясы уақытша бета-тестілеу режимінде қолжетімді. Бұл Яндекс технологиясының кейбір функционалдық мүмкіндіктері тұрақсыз жұмыс істеуі мүмкін екенін, Пайдаланушыға елеулі әсер етуі мүмкін жұмыстағы іркілістер, деректердің жоғалуы және басқа да күтпеген қателер болуы мүмкін екенін білдіреді. Яндекс технологиясын пайдалана отырып, Пайдаланушы онымен байланысты барлық тәуекелдермен келіседі. Яндекс технологиясының жұмысында кез келген ақаулар, іркілістер мен проблемалар туындаған кезде Пайдаланушы https://yandex.ru/support/docs сілтемесі бойынша өтіп, олар туралы Яндекске хабарлай алады.

2.6. Яндекстің Сервисін пайдалану кезінде Пайдаланушыға Құжаттарда (мәтіндік файлдарда) «ЖИ-редактор» («ИИ-редактор») және Кестелерде «ЖИ-функциялар» («ИИ-функции») функциялары қолжетімді болуы мүмкін. «ЖИ-редактор» Пайдаланушыға оның сұрауы бойынша Яндекстің жасанды интеллект технологияларын Құжаттарда мәтін генерациялау үшін, сондай-ақ Пайдаланушының Құжаттарындағы мәтінмен жұмыс істеу үшін, оның ішінде қателерді жою, мәтінді қысқарту және оның стилистикасын өзгерту үшін пайдалануға мүмкіндік береді. «ЖИ-функциялар» Пайдаланушыға оның сұрауы бойынша Яндекстің жасанды интеллект технологияларын Кестелерде деректерді талдау және өңдеу, мәтін генерациялау, суммаризациялау және өзге де қолжетімді командаларды орындау үшін пайдалануға мүмкіндік береді.

«ЖИ-редактор» және «ЖИ-функциялар» функцияларын пайдаланған кезде Пайдаланушы https://yandex.ru/legal/yagpt_termsofuse мекенжайы бойынша орналастырылған Яндекстің генеративтік жасанды интеллект технологияларын пайдалану шарттарын қабылдаған болып есептеледі.

Пайдаланушы «ЖИ-редактор» және «ЖИ-функциялар» функцияларын өзіне қолжетімді функционалдық шеңберінде осы Шарттарға, Яндекстің генеративтік жасанды интеллект технологияларын пайдалану шарттарына және қолданылатын заңнамаға қайшы келмейтін кез келген тәсілдермен пайдалануға міндеттенеді. Осы Шарттардың және Яндекстің генеративтік жасанды интеллект технологияларын пайдалану шарттарының шеңберінен шығатын кез келген пайдалану Яндекспен алдын ала келісілген жағдайда ғана мүмкін болады.

«ЖИ-редактор» және «ЖИ-функциялар» функцияларын пайдалана бастағанда, Пайдаланушы көрсетілген функцияны рұқсатсыз пайдаланудан қорғаудың техникалық құралдарын айналып өтуге бағытталған қандай да бір әрекеттерді жасамайтынына және жасамайтын болатынына кепілдік береді. «ЖИ-редактор» және «ЖИ-функциялар» функцияларының элементтерін кез келген көшіруге, жаңғыртуға, қайта өңдеуге, таратуға, жалпының назарына жеткізуге, техникалық қорғау құралдарын айналып өтуге не осы функция ұсынатын мүмкіндіктер шеңберінен тыс өзгеше пайдалануға, сондай-ақ оларды Яндекстің алдын ала алынған келісімінсіз коммерциялық мақсаттарда кез келген пайдалануға тыйым салынады.

Пайдаланушы «ЖИ-редактор» және «ЖИ-функциялар» функцияларын пайдаланған кезде Яндекс алынған нәтижелердің сапасы, толықтығы, дәлдігі, анықтығы, дұрыстығы үшін жауапты болмайды, сондай-ақ функциялардың үздіксіз және қатесіз жұмысына кепілдік бермейді.

Нәтижелер жасанды интеллект технологияларын пайдалана отырып автоматты түрде жасалады, осыған байланысты алынған нәтижелер бірегейлікке ие болмауы және басқа Пайдаланушылардың сұраулары бойынша жасалған нәтижелермен толық немесе ішінара сәйкес келуі мүмкін.

Яндекс Пайдаланушының «ЖИ-редактор» және «ЖИ-функциялар» функцияларын пайдалануы барысында алынған нәтиже мазмұнының заңдылығы мен анықтығын бағаламайды және оның мазмұнына және оны Пайдаланушының одан әрі пайдалануына әсер ете алмайды. Пайдаланушы алынған нәтиженің дұрыстығын дербес тексеруге, сондай-ақ алынған ақпаратты одан әрі пайдалануға байланысты өз тәуекелдерін бағалауға міндеттенеді.

«ЖИ-редактор» және «ЖИ-функциялар» функцияларын мәтіндер мен өзге де материалдарды жасау немесе өңдеу үшін пайдалана отырып, Пайдаланушы барлық тәуекелдерді, оның ішінде үшінші тұлғалардың айрықша құқықтарын бұзуға байланысты тәуекелдерді өзіне қабылдайды.

Пайдаланушы «ЖИ-редактор» және «ЖИ-функциялар» функцияларын пайдалану барысында алған нәтижелердің мазмұны Яндекстің, оның қызметкерлерінің пікірін білдіру болып табылмайды және шешімдер қабылдау немесе қандай да бір әрекеттер жасау кезінде басшылық немесе кеңес ретінде бағалана алмайды.

«ЖИ-редактор» және «ЖИ-функциялар» функцияларын және/немесе олардың элементтерін, сондай-ақ оларды пайдалана отырып алынған нәтижелерді жасанды интеллект технологияларын пайдалана отырып жұмыс істейтін модельдерді тестілеу немесе оқыту мақсаттары үшін пайдалануға тыйым салынады.

Жарияланған күні: 02.10.2026